港台第二台《瘋Show快活人》主持人曾志豪噚日朝早主持節目時唔記得閂咪，節目休息時段喺咪後講咗一句「X你老味」，結果當然係……出咗街，其實曾志豪喺重新開咪後，已經公開道歉；佢話當時正熱烈討論一啲話題，忘記熄咪，結果講咗啲大人同細路都唔應該聽嘅說話，所以同大家講聲對不起。港台證實收到投訴，管理層決定即日起停止曾志豪主持節目至22日，23日（周一）復工。曾志豪話忘記熄咪係犯咗低級錯誤，面對責任接受懲處，仲自我決定停賽期間連周五播出唞暑前最後一集《頭條新聞》都唔主持。
致歉坦承唔專業
喺呢個節目嘅facebook專頁，噚日唔少網民留言，正負評均有，有網民話唔係有心，「咩咁大件事啫？」「罪不致死，佢都馬上道歉，希望高層畀次機會豪仔。」另有網民喺fb分享事件，唔少人話喺大氣電波講粗口唔多啱，甚至話要炒喎。
港台機構傳訊及節目標準總監伍曼儀話呀，雖然曾志豪已喺節目中道歉，但都係違反咗《節目製作人員守則》，主持節目時講粗口表現不專業，希望透過近兩周時間畀佢反思今次行為。除咗主持周一至五上午《瘋SHOW快活人》，曾志豪周日都會主持《中女宅男殺很大》，停賽期間呢個節目都冇得主持。
曾志豪解釋當時與同事咪後討論時「有好多情緒」，討論至激動時講咗句粗言穢語，咁啱又按錯掣令咪後言論「出街」，雖然即時道歉，「我哋都覺得係唔專業嘅表現」，坦承做錯願受懲處，仲決定唔主持本周五唞暑前最後一集嘅《頭條新聞》。佢以「服務提供者」形式受聘於港台，換言之今次唔單止冇咪開，呢段時間冇工開就冇糧出。
李八方