近日就港鐵沙中綫醜聞頻頻發功，未有隨建制派保皇甚至要求以特權法調查嘅實政圓桌田北辰決定唔再競逐連任財委會副主席，佢話呢個決定係因為「欠債要還錢」，若要連任就要向建制派拉票，但到建制派要求佢幫手時佢「有時制有時唔制」，覺得好難做，「唔係我啱佢哋錯，不過我真係過唔到自己嗰關」。
田二少話財委會副主席唔係一個普通位，「人哋（建制派）個個都爭嘅，人哋對你有期望嘅，係咪？如果我投反對票，其實都OK，但我反對票可能唔可以投得太多，又唔可以唱得太行，好多時我唔能夠講到心裏面嘅說話囉！」回顧任內表現，佢話迪士尼撥款一役若非做副主席，相信唔會咁難受，又話最近動議引用特權法查港鐵，有建制派呻被佢擺上枱，「姑勿論係咪真係擺佢哋上枱，咁我始終聽到嘅嘢就係聽到嘅嘢，咁有乜意思？都唔開心，咪唔做落去囉！」佢話做咗副主席好似仲慘，會上講嘢都講唔到。問到有乜人啱接任？「最硬淨嗰個吖嘛！葉劉淑儀吖嘛！」八方問過葉劉，佢以三粒字回應：「冇興趣」。