當年喺高登討論區有「慈雲山鄭列瓊」之稱嘅瓊姐，因為捍衛偶像容祖兒，經常打擊被視為祖兒嘅對手，包括楊千嬅、謝安琪、以至G.E.M.等等而成為咗網絡紅人，不過之後佢去離開咗高登，轉咗個場去咗fb開專頁，仲改埋個名叫「King Jer娛樂台」。
呢個經常以刻薄抵死言論見稱嘅King Jer，近年嘅內容都唔再係只講娛樂新聞，有唔少公司吼住佢有好多follower，仲促成咗好多商機，於是King Jer又多咗個KOL嘅身份。點知昨早「King Jer娛樂台」突然喺fb「消失」咗，仲連搜尋都完全搵唔到，唔知係自己消失，抑或係被消失呢？
《蘋果》昨日向King Jer方面了解，發言人就話：「我哋都未知乜事，今(昨)早已聯絡facebook了解一吓，facebook都跟進緊！」
而直至昨午1點左右個專頁終於恢復運作，King Jer喺fb留話：「向大家報個平安，完全唔知咩事，個 page 無故 disappear without any notice，仍然等待 facebook答覆原因！驚動到大家唔好意思。」