實不相瞞，我是一個玩具控，由日本的高達、筋肉人、合金魂，到香港品牌Hottoys，收藏都有幾百件，講真我冇認真數過。除了本身童心未泯，可能更多是心癮。話說細個家貧冇錢買玩具，家陣買返夠本以撫平童年的「心靈創傷」。
當然我不是乜都買亂咁買，造型手工材料靈活度像真度缺一不可，近幾年開始入手的Hottoys產品，在世界各地都是公認最高質素玩具成品之一，長期獲迪士尼及荷李活授權製作figure，實為香港品牌的驕傲。尤其限量的「限定版」一直有價有市，更是炒家目標。
每年暑假舉辦的動漫節，Hottoys都會推出幾款限定版，好似今年就是夜光版鐵甲奇俠、黑衣人美國隊長，少年黑武士Anakin和黑豹老豆T'Chaka。
預期跟過往一樣，受歡迎的角色如鐵甲奇俠和美國隊長會炒貴一、兩千蚊，黑豹老豆都有幾百啩。若然在有價有市時成功出售「四寶」，大概賺到兩至三千蚊吧！
玩家炒家齊爭限定版
不想買貴嘢，唔該排隊喇。如果你是會員還好一點，公開預訂前會有三日給你優先預訂（訂完要限時限刻去動漫節現場再排隊取貨），我星期日去信和諗住訂番套，見條隊有幾十人，即刻放棄。
之後一日輪到非會員，開門前一晚人龍由信和沿住彌敦道排到去銀行中心，有咩驅使佢哋大熱天時半夜三更排隊呢？係愛呀？定係責任呀？
玩家當然在討論區鬼殺咁嘈，話出現大量排隊黨，又打尖，要出動警察在場維持秩序，其實跟買黃子華飛情況差不多，不過Hottoys老闆冇行出來申訴炒家賺得多過佢。最後矛頭直指Hottoys此賣法有幫自己造勢之嫌，旺角排一次，會展排一次，搞到兩個場都好擠擁、玩具好搶手的氛圍，被指利用忠粉的熱情。
其實早兩、三年Hottoys都聽到他們的憤怒聲音，嘗試變一變，希望做到公平公正公開，學發展商玩抽籤，想買就網上實名加身份證填Form，抽到你會收到email通知去現場買貨，夠公平喇啩？
吓，你怎估到又收到大量投訴，話炒家們狂搵人頭入飛抽籤，減少真正玩家的中籤率，總之買唔到就唔公平啦！Hottoys衡量過之後，今年又轉番排隊，反正點都俾人鬧，造吓勢都好。
做生意除了產品質量好，還要兼顧客戶的需求，難度相當高。其實如果大量生產，想買幾多有幾多，到時又有人怨唔值錢嘅箒！
郭釗
http://fb.com/heaology.edu
本欄逢周四刊出