最近好興玩懷舊，噚日立法會有議員提口頭質詢，關注公共屋邨入面嘅兒童遊樂設施成日失修，而且又單調乏味，問政府會唔會改善，點知講講吓變「老人院」時間，議員回憶以前公共屋邨遊樂設施，負責答嘅民政事務局局長劉江華仲自爆做過街童！
話說議員話𠵱家兒童遊樂場設施又單調又悶，完全唔吸引，民主黨鄺俊宇問劉江華，究竟佢細個有冇玩過以前公共屋邨兒童遊樂設施？劉江華就快答有，仲話佢細個都係街童嚟！之後班議員齊齊「老人院」時間，話以前公共屋邨兒童遊樂設施有韆鞦、繩網、馬騮架，又話以前滑梯又快又刺激，𠵱家嗰啲真係唔得！劉江華就答政府要兼顧安全性，以後會盡量整多啲受歡迎設施，其實𠵱家家長對仔女咁緊張，都未必會畀仔女去玩繩網、馬騮架呢類設施。