娥特早前喺7.1傳媒茶敍時點名TVB新聞部高層袁志偉，批評有報道出錯促修正，搞到袁志偉俾行家笑兼面燶燶後，大台早前因喺2017年特首選舉前嘅新聞報道中，兩次遺漏部份候選人名字，包括漏咗除林鄭、曾俊華、胡國興、以及入唔到閘嘅葉劉同梁國雄外嘅另外7名候選人，被通訊局裁定違反選舉公平原則，向大台發出勸喻。
大內總管嚇到狂咳
據聞大台對此相當不滿，除咗前日以「有議員指選管會指引對候選人定義欠清晰 傳媒難執行」為題嘅報道反擊，噚日亦派記者到特首辦喺行會前質問娥特：「林太，你自己參選過特首啦，你可唔可以講得出你自己參選嘅時候，有幾多人同你一齊宣佈參選，同佢哋全名係乜嘢？你又覺得呢啲指引係咪切實可行？會唔會檢討吓？」聽到大台尖銳提問，企喺娥特身後嘅特首辦主任陳國基突然咳到彎晒腰……
娥特回應質問時當然無講仲有乜對手，只係話選管會同通訊事務管理局都係相對獨立嘅機構，係按法例同指引就每個案得出睇法，但不忘指會重新檢視報道選舉嘅指引有冇修訂空間，唔知大台收唔收貨？