正所謂「你有壓力我有壓力」，特別係要捱更抵夜工作嘅人，更加容易做到心火盛，好似落馬洲管制站嘅「皇巴」司機同車站職員咁，嘈到要阿Sir調停，最終仲要乘客換車，煩到其他人，真係唔多好囉！
三警到場勸交
讀者郭小姐一家大細返完大陸玩，喺噚日凌晨1點幾經落馬洲返香港，一行五人包括一個只有幾歲大嘅小朋友，由於已經夜深，過咗境嘅旅客個個都好想快啲返屋企，一見到皇巴士當然即刻上車。
郭小姐話，巴士一開門，個司機就即刻怒氣沖沖咁衝落車，初時大家都無為意照上車，但等極司機都未上返嚟，仲聽到有爭執聲，「聽到『嘭』一聲，仲有個女人大叫！」原來司機同站頭嘅女職員嘈起上嚟，女職員話「我有call上台」、「我唔可以成世咁俾你屈」。
郭小姐聽佢哋嘅對話內容，估計佢哋因為工作嘅事而嘈交，就咁嘈咗幾分鐘之後，有乘客開始鼓譟，大叫司機上返車、「好男不與女鬥」。
呢個時候，司機上返車，但女職員亦都跟埋上車繼續嘈，仲想喊咁嘅樣，無幾耐就有三個阿Sir到場勸交，由於雙方都非常激動，司機仲企咗起身想打人咁款，阿Sir即刻喝止佢，而個女職員就由另一名女同事拉落車。
「佢就算開番車我都唔敢坐，容乜易好似大埔（九巴車禍）嗰單咁㗎！」郭小姐恐防巴士司機情緒受影響，於是改搭另一班皇巴離開。