爆相爆片：
政總「劉江華」起火燒燶

30幾度嘅高溫，真係熱到人火都嚟，金鐘政府總部對出嘅垃圾桶直情着晒火，不過阿Sir調查之後，懷疑有人縱火。

阿Sir話有可疑

個着火嘅垃圾桶就喺連接海富中心同政府總部行人天橋下面，喺噚日近中午時分，有市民發現個垃圾桶成個着晒火，離遠睇就好似一個火球咁，消防員嚟到後，好快就將火救熄，個垃圾桶燒到燶晒，就連入面嘅報紙都剩低一堆灰燼。
由於着火垃圾桶就位於政總對出，阿Sir都好緊張，又翻睇附近嘅閉路電視，初步調查後認為事件有可疑，已經交咗畀中區重案組接手調查。

其實政總附近嘅垃圾桶都多災多難，2015年底，立法會「網絡廿三條」二讀當晚，立法會外示威區一個垃圾桶被縱火而引起爆炸。兩名青年葉卓賢及楊逸朗其後被裁定串謀縱火罪成，分別被判入勞教中心及入獄兩年。