由細到大阿媽教落，冇錢就唔好買，更加唔可以去偷。北角有位阿姐，幾十歲人好似仲唔明呢個道理，竟然喺時裝店偷咗條400蚊嘅褲，令店主黃先生好激氣，大鬧「斯斯文文竟然偷嘢」。
黃先生喺北角港運城1樓開時裝店18年，上星期六（7號）下晝2點半左右，店員發現舖頭一條白色短褲唔見咗，得返個衣架，好明顯係俾人偷咗！
入舖即犯案
黃先生於是翻睇閉路電視，發現一個40幾歲，身穿白背心白短褲，孭背囊同斜袋嘅四眼阿姐，喺1點37分行入嚟，極速將短褲扯落嚟塞入斜袋，全程只係3秒左右，真係少啲眼力都好難發現。
黃生話嗰日喺倉執緊貨，店面得一個女職員，而由於係周末，顧客都唔少，店員同一時間招呼幾個客，結果走漏眼，俾四眼阿姐有機可乘。黃生認為四眼阿姐一行入舖頭就作案，目標明確，手法純熟，睇得出非常專業，「佢一入嚟唔使巡場，好似好熟環境咁，明顯喺出面望咗一排！」黃生店舖用落地玻璃，企喺出面都一眼睇晒。
「着白褲偷白褲，呢啲人咁貪心！」黃生星期日已經報警，講返件事仲好勞氣，佢話之前間中都俾人偷嘢，除咗衫褲唔見，店員嘅手機亦曾被偷，呢件事之後黃生會加裝閉路電視，仲提醒店員打起十二分精神。
警方回覆話，周日（8號）接獲一名姓莊女子報案，指店內一條價值400元短褲被偷走，已將案件列作店舖盜竊跟進。