文章見街之時，法國比利時勝負已決，乃三國鼎立之時，今晚尚餘十字軍英格蘭對格仔兵克羅地亞，克羅地亞之前兩戰皆和，前後踢足240分鐘，耐力持久之餘，12碼亦見信心，英軍此仗能否速決成疑，尤其10號仔史達寧，當日對瑞典之時，多次臨門撻Q，甚至埋門應射時自扭，失去黃金機會，振英者，輕則問候其母，重則爆樽填憤，對陣時誰會考慮和理非非？幸好最後2:0完場，否則和波加時12碼的話，結果可能改寫。
史達寧一仗慘成敗家仔，希望今晚戴罪立功，一洗污名。此子原籍牙買加，出身窮困，兒時唯一娛樂就是踢球，球，還要是用汽水罐代替的。他兩歲時，父親慘遭槍殺，所以最近右腳上紋了一個步槍紋身，承諾自己永遠不接觸槍械，另外自己亦多用右腳射門，這紋身就有此特殊意義。史達寧今屆仍未開齋，此君今晚會否開佢支「善良之槍」？又還是像警察般向天放槍示警咁有型？看官且拭目。
愛國球迷搞事應「包容」
居於倫敦的朋友來報，原來英格蘭比賽之時，幾乎所有活動停頓，商場馬路皆空，全城盡撐英軍，只要英軍一掂波，當地球迷就觸動神經鬼殺咁嘈，就如香港愛國人士一樣，一入波，手上啤酒全部飛天，啤酒水炮之下無人倖免。尤其進入16強後，辦公室人人討論足球，全民皆曉波，沒心機上班之餘，更甚者還射波唔返工。
倫敦人一向冷面，但贏波期間個個似建制派助選團一樣，靚聲過張學友，笑容多過劉華，朋友還說，如果今晚大戰克羅地亞，贏波，應該冇人返工直至決賽日，輸波，全城面燶過被議員質問的沙中綫各單位，甚至小型暴動都有可能。
小型足球暴動者，就似曾德成口中的六七暴動，是自發無組織的，愛國人士自己「醞釀」出來。早前英格蘭拉瑞典下馬後，振英愛國球迷竟然闖進瑞典傢俬店搞事搗亂，將偉大的愛國情操用動感表現出來，醜態即時全球網上瘋傳，如果英國有大公報，應該會加以表揚，愛國令人盲目，愛到旁人側目（而真正愛國曉波者反而入獄），如果英格蘭輸波，燒車放炸彈都應該被原諒，暴徒甚至有機會升官晉爵，港人見慣，愛國嘅嘢，我哋識條龍門柱。