34歲嘅一代西班牙王子費蘭度托利斯周二終於落實去向，呢名射手約滿離開馬德里體育會後，確定轉投日職加盟鳥棲砂岩，會着9號嘅費托仲即場高舉新東家嘅波衫橫額，上面仲寫明「呢次唔係誤報」，不過暫時未知費托幾時可以喺日職上陣！
簽約三年年薪5,600萬
前西班牙國腳費托喺周二舉行佢嘅個人新書發佈會，並公佈自己加盟鳥棲砂岩：「鳥棲砂岩差唔多係首支話對我有興趣嘅球會，佢亦喺體育同其他重要項目上說服到我。去日本同日職，對我嚟講會係一個好好嘅經驗，我亦希望帶領球隊重返應有嘅位置。」根據日本同西班牙傳媒報道，費托同鳥棲砂岩簽約三年，年薪約為八億日圓（約5,600萬港元）。
鳥棲砂岩現時喺日職踢咗15場，錄得三勝四和八負得13分嘅成績排喺尾二，身陷降班區域，表現再唔改善，隨時下季日乙見。日職喺下周三重開，鳥棲就會作客湘南比馬，未知費托幾時可以上陣嘞。
以前係馬體會同利物浦王子嘅費托，係馬體會嘅青訓產品，亦都效力過車路士同AC米蘭等大會，2011年以破當時英超紀錄嘅5,000萬鎊由利物浦轉投車路士最震撼。佢曾經代表西班牙上陣110場攻入38球，贏過2010年嘅世盃，仲有2008同2012兩屆歐國盃，但係佢去咗車路士後就唔多掂，雖然2012年贏過歐聯同英足盃、2013年又贏過歐霸盃，不過就多咗「廢托」呢個污名。
神戶擁小白普多星味濃
費托喺2015年初借用返去馬體會起，三年半喺各項賽事上陣150場入咗37球，更喺啱啱完嘅球季拎咗佢喺馬體會生涯嘅第一個獎盃──歐霸盃，如今離開母會，相信王子都冇咩遺憾。費托喺馬體會歷嚟入咗130球，係球會史第五多入球嘅球員。
喺世盃前，西班牙另一名前國腳「小白」恩尼斯達已確認轉投神戶勝利船，神戶本身亦已有前德國國腳普多斯基做隊長，𠵱家輪到鳥棲又有費托加盟，日職嘅星味又再一步提升。喺11月10日，神戶勝利船會喺主場迎戰鳥棲砂岩，將會係三大球星嘅第一次交手，一眾神戶球迷都話好期待賽事來臨。