黃又南同一名女新人，前晚近9時喺銅鑼灣崇光百貨附近嘅行人用區，為導演劉韻文執導電影《花明度》試戲，但攝製隊涉與一名外籍男子發生肢體衝突，要警員調停。
當時電影正拍攝又南向着崇光方向行去，於是攝製隊邊跟隨邊向後倒行，現場好多巿民見電影拍攝就以手機影相，工作人員同時猛叫途人唔好影。其間，攝製隊向後退時，一度碰撞到一名外籍男子，於是當攝製隊再拍攝時，外籍男子仍未肯走，一度跟攝製隊口角發生衝突，有人目睹工作人員等約兩、三人追着外籍男子追打，外籍男子臉部被擊中，攝製隊成員追打完外籍男子後再繼續拍攝，外籍男子由女性朋友商議協助下報警處理，相隔一會即有警員出現調停。
電影由陳善之、林炳坤、已故鄧光榮大女鄧業炘監製，《蘋果》向陳善之了解事件，佢話現場攝製隊同佢講：「當攝製隊同又南試緊一個鏡頭嘅時候，嗰個外籍男士不停咁企喺攝影機同又南中間，後來工作人員叫佢借開一啲，佢就再走去又南後面嘅位置，最重要係佢做出一啲不雅嘅動作。」陳善之又話：「工作人員見到咁嘅情況，於是就走去嗰個外籍男嗰度，用身體隔開佢，可能期間發生一啲身體碰撞，個外籍男士就話要報警喇！」