阿根廷足總周一公佈,由於俄羅斯世界盃決賽周期間領軍嘅教練森柏奧利同意帶領阿根廷U20出戰本月嘅一項賽事,佢哋會等到本月底至定決佢嘅去向。阿根廷世盃驚險出線後,喺16強以3:4不敵法國遭淘汰,當時森柏奧利指未係時候考慮自己前途問題。森柏奧利周一同足總高層會面,檢討球隊喺世盃期間表現,其後足總透露森柏奧利會領軍阿根廷U20出戰一項盃賽,所以佢嘅去留等七月底至會有決定。根據報道,同阿根廷足總簽約到2020年嘅森柏奧利,合約列明如果佢喺2019年美洲國家盃前被炒,阿根廷足總要向佢賠償800萬美元(約6,278萬港元),所以陷入財困嘅阿根廷足總,都要諗清楚先。