網上公審唔代表自己一定啱晒，有時反而會引火自焚。有個男人前日喺新填地街邊違例泊車，俾警員抄牌之後好唔順氣，仲用手機拍攝警員放上網公審，結果反而招嚟大批網民指摘佢「做錯晒」，仲反轉過嚟俾人起底公開身份。
根據嗰個男人上載上網嘅短片所見，警員當時拎住本簿抄牌，一邊質問拍片男人：「咁鍾意周圍泊新填地街，違法位當合法呀，係咪問過你先可以抄牌？你自己擺違法位，仲聲大夾惡？」片段作結前，警方再補多一句：「你影好啲呀，記得擺上網，唔擺正契弟！」上載者未有詳細交代事情始末，但有另一個網民隨即將事發現場照片放上fb，清楚可見司機將一架奧迪房車泊喺新填地街455號對開上落客區，仲向警員舉機拍攝。根據交通道路條例，只有在上落貨時先至可以泊車喺上落客區較長時間，估計司機將該區當作泊車位，而俾警員票控。
被轟「揸靚車大晒」
短片出街後，大批網民群起圍攻拍片男人，批評佢「揸靚車，咁有錢以為自已大晒」，又指「泊得街，就要預咗俾人抄牌嘅風險，唔抄係好彩，抄咗係應該」，反讚警員「今次真係有做嘢」，其後網民進一步向上載者起底，揭發對方原來係現役足球員，司職後衞，曾踢過U20香港足球代表隊，其個人資料鋪天蓋地遭人公開。
警方回應話，前日上午約11時45分係旺角新填地街進行交通管制，其間共發出4張違例泊車定額罰款通知書，警務人員根據法例同既定程序執行職務。當市民遇上警員執行職務時，希望佢哋能給予理解同配合。