周三係英格蘭事隔28年後再次打入世界盃四強，將會大戰克羅地亞爭入決賽。國際足協已經決定咗呢場四強戰嘅球衣安排，三獅軍團會着上白衫白褲出戰，係今屆世界盃第一次。不過，全白戰衣過去對英軍就唔多「老利」，事關佢哋上屆世盃就係着全白打分組賽，結果一場都贏唔到，仲提早執包袱㖭。
上屆咁着贏唔到波
雖然今場比賽克羅地亞畀國際足協列為主隊，但格仔軍招牌嘅紅白格仔主場波衫，同英格蘭主客波衫都撞色，所以令克羅地亞要繼16強同八強後，再次着上藍黑格仔嘅客場球衣。之不過，因為波褲顏色都類近，因此英軍唔可以着佢哋傳統嘅海軍藍波褲，而要改着白褲，而龍門亦要改着黃色波衫。
英格蘭喺今屆之前曾經兩次踢過世盃四強，不約而同兩次都係着白色波衫，第一次係1966年喺溫布萊球場以2:1擊敗葡萄牙，第二次就係1990年互射12碼後畀西德淘汰。但英軍上屆就試過着全白戰衣出戰世盃，三場比賽面對意大利、烏拉圭同埋哥斯達黎加一場都贏唔到，只係拎到一分就出局，唔知今屆又可唔可以着全白戰衣威番次？
華迪好番可以候命
講番場波，上周六對完瑞典嘅八強賽後，英格蘭中場佐敦軒達臣大腿筋同埋門將比克福特嘅左手姆指都有啲傷，但噚日英國傳媒都指兩位嘅傷勢冇咩大礙，可以正選上陣。八強一戰缺陣嘅前鋒占美華迪亦可以克服腹股溝傷勢，喺周三嘅四強賽事候命。克羅地亞方面，上場尾段拉親但係都捱足全場嘅門將蘇巴錫，隊長莫迪歷就話佢情況ok，周三可以繼續上陣。不過，右閘維沙積高就冇咁好彩，八強對俄羅斯一戰打到加時因為膝蓋受傷退下火線，根據《馬卡報》報道，呢位馬德里體育會右閘好可能會缺席四強比賽，估計主帥達歷會將杜馬高維達移到右路，中堅位置由老將哥魯卡配搭洛夫雲。
賽前格仔軍主帥達歷就大玩心理戰，讚英格蘭係一支冇明顯弱點嘅球隊，仲大讚上場好敗家嘅史達寧好大威脅，成頂高帽咁笠落英軍到。
