葡萄牙喺世盃16強出局，主將基斯坦奴朗拿度（C朗）亦有得提早放暑假，雖然佢轉會祖雲達斯消息嘅鬧得熱哄哄，但佢就一於少理，已經同家人去咗希臘度假（圖）。據希臘傳媒報道，C朗同家人坐私人飛機到希臘，再轉搭直升機去伯羅奔尼撒半島享受假期。C朗女友佐珍娜近日亦喺ig上載同C朗喺希臘合照放閃，同時亦有上載二人同小C朗嘅合照大晒溫馨。據意大利《天空體育》推算，祖雲達斯如要將C朗收歸旗下，可能耗資高達四億歐元（約36.7億港元）。當中C朗嘅轉會費大約係1.2億至1.5億歐元，而呢位葡萄牙球星求要不低於3,000萬歐元年薪，換言之稅前年薪高達6,000萬歐元，故總預算約為四億歐元。