人生要搵一個肯食麥記嘅女友已經好難，原來做一個稱職嘅麥麥送外賣員仲難！網上流傳兩張麥麥送定單，其中一張要求外賣員向開門接餐嘅顧客講聲「生日快樂」；另一個要求深夜喺出現靈體嘅藍田公屋單位送單，仲提醒要帶靈符傍身，莫非要個外賣員去凶宅送餐練膽？
笑壽星仔「慘豬豬」
有網民喺fb分享咗一張麥麥送外賣單據相片，除咗列明日期時間同送餐地點外，最特別係附註講明：「麻煩㩒鐘時同時向大隻佬講聲『陳XX』36歲生日快樂。」上載張相嘅網民話：「見到張單呆咗。」呢個post出街之後，隨即俾網民洗版，有人講笑問「叫埋麥當勞叔叔同你講好嗎？」亦有人笑壽星仔：「慘豬豬36歲生日飯只可以食老麥。」然而有同樣從事送貨嘅網民感同身受，呻試過送貨「有單叫唱埋生日歌」。
不過更爆嘅係，再有人分享另一張麥麥送外賣單據，清楚見到送貨地點係藍田平田邨平旺樓，時間係深夜11點幾，最搞笑係附註顧客嘅溫馨提示：「此地址有靈體，備註外賣員不必要看防煙門、後樓梯，最好必須唸經帶護身符前來…免得日後遭遇麻煩。」有網民睇完以為係PS改圖，立即金田一上身翻查資料，發現喺過去17年同一大廈已先後有多宗上吊、跳樓及燒炭自殺，大嘆真係名副其實嘅凶宅。
麥當勞回覆件事就話好重視顧客服務，外賣定單備註亦係方便顧客提供內容及指引，不過提醒若與定單內容無關或超出指引要求，外賣員未必會配合，只會適當去處理件事。