有人話過做立法會議員似吸毒，好易上癮，怪唔得咁多人都戀棧個位，連任多屆都唔肯退位。工黨「鬍鬚俠」、新東張超雄肯定唔係呢類人，佢噚日同八方講明下屆唔會再參選，又或者只會排名單第二、力撐年輕過佢30年嘅工黨主席郭永健接棒。
續為社會爭取公義
其實呢個世界邊有人係不能夠取替？鬍鬚俠話做埋呢屆，自己都做咗12年議員，覺得喺議員崗位相當長時間，係時候轉吓位，但關心弱勢、為殘疾人士爭取社會公義嘅工作唔會停。據知佢今年先首次喺香港置業，唔做議員供樓有冇困難？佢話唔做議員都要再搵工：「做議員唔可以因為個入息而做，呢個唔係一份工，如果我因為經濟需要而做呢個崗位，我就立即應該唔好做嘞！」目前立法會議員月薪約10萬，唔通就係令唔少人戀棧？
佢力撐郭永健接棒，希望幫到呢個年輕黨主席，但坦言呢個安排都係其一可能，「兩年（2020年換屆選舉）就可以有好多變化、好難講，到時要睇成個形勢」。
其實鬍鬚俠去年初曾因腎石痛兩度入院，佢話家人不時勸佢唔好做議員，因為實在責任好大同好辛苦，自己亦覺得要畀身體休息吓，坦言健康都係作出決定嘅考慮，苦笑指平日開會「去廁所都無時間」，相信未來唔做議員有更多時間陪家人，佢亦考慮重新教書，相信未來工作都係同爭取社會公義同服務殘疾人士分唔開喎。
李八方