一向重視全人教育嘅中大醫學院下學年有新搞作，會同中大文物館舉辦文物觀賞課程。唔好以為鑑賞文物同學醫無關，醫學院院長陳家亮話，藝術教育都係全人發展嘅重要一環，透露自己愛好收藏玉器，覺得觀賞玉器可以鍛煉心思同觀察力，對照顧病人、斷症好有幫助，希望醫科生學到嘢。
呢個課程一堂過3小時，唔係必修、唔計學分，由醫學院教授同文物館代表一齊教學生欣賞文物嘅細節同背後社會意義，兼夾講吓醫學倫理同知識。醫科課程加入藝術元素，耶魯大學醫學院已經行咗20年有多，仲做過研究，參加2.5小時藝術欣賞課程嘅醫科生，做描述皮膚疾病影像測試時成績比冇上堂嘅好啲。
師承嶺南派國畫大師趙少昂嘅中大醫學院助理院長趙偉仁都話，因為習畫，對顏色嘅細微差異好敏感，「睇片」都得心應手啲；而良好手感亦令佢觸診、斷症時更有信心。