特首林鄭月娥早前落咗柯打，要求司局長要喺社交平台講吓過去一年做咗乜嘢，咁多位司局長都好聽話，乖乖交代自己一年以來嘅工作，噚日就輪到奶媽愛將勞福局局長羅致光向公眾「述職」，喺局長網誌上載咗一條短片，名為《勞福廚房煲煲辣》。片中羅致光化身大廚，介紹過去一年有咩政策已「煮好」，有咩政策「仲煲緊」，唔知有冇嘢係「無米粥」？
短片一開始，大廚羅致光就被侍應副局長徐英偉催促，話「出面有好多客，有啲咩餸係可以攞出去先？」佢就話已經有「三煲嘢搞掂咗」，包括高額長生津、優化職津、幼兒社工服務先導計劃，同埋籌組兒童事務委員會等等。
要等「客人」適應
之不過呢，侍應就話外面啲「客人」好急，話煲煲都要快，但羅大廚覺得快唔嚟，佢話好似增加侍產假、檢討政府外判服務員工保障、幼兒照顧服務檢討等雖然「落咗煲」，但要「夠質素」，如果未整好就攞出來俾人打回頭，反而會慢咗。
然後就有一個大鑊飯，羅致光介紹返，話係今屆政府招牌菜，咪就係「取消對沖炒飯」，仲話呢碟係新菜式，好多老友記同顧客唔適應，要慢慢煮咁話。雖然未上枱，八方已經感覺到，呢個大鑊飯，對資方嚟講「鑊」氣十足。
李八方