做人手多多唔係好事，仲被錄低整個過程，咁就真係自暴其醜。fb群組「小心駕駛」近日上載一段短片，顯示一位紋身男無端端向一輛停泊路邊的汽車「毛手毛腳」，先將人哋架車的水撥逐一豎起，然後再用手調校人哋個倒後鏡，跟住笑笑口咁走咗去，成個過程咁啱俾車Cam錄低晒，上載短片的片主留言：「架車好地地喺度休息緊，請問你點解無端端攪佢呢？」但佢未有寫明事發地點及時間，未知何時發生。
呢段片推出後，引來好多網民熱烈評論，有人話涉事者「咁大個人都唔化」，亦有人講笑咁講：「佢怕你俾阿蛇抄牌，整起晒啲水撥，咁就無得夾牛肉乾，太好心喇！」甚至取笑佢對錄影懵然不知：「佢又幾上鏡喎！」不過大家焦點在於究竟紋身男有無犯法，有人就話搞人架車，有刑事毀壞之嫌，但亦有人講佢只係手多，都無整壞嘢，理論上唔算犯法，車主下次泊車只能貼佢個大頭相出嚟警誡吓佢。無論如何，無端端搞人架車，畀你係車主都唔中意，建議嗰位紋身男唔好咁多手！