話咁快世界盃八強賽事聲就踢完喇，16強踢走咗葡萄牙C朗同阿根廷美斯兩大球王之後，八強連巴西嘅尼馬都冇埋可以提早返屋企，加埋烏拉圭嘅卡雲尼同蘇亞雷斯兩位神鋒落馬，令到南美球隊全軍覆沒，四強淨返全部都係歐洲球隊令世界盃注定係由歐洲隊四連霸喇。
周二深夜上演嘅上線四強賽事將會由法國對住比利時，PSG嘅前場三劍俠只係淨返麥巴比一個，高盧雄雞對住歐洲紅魔呢隊英超聯隊一定鬥到難分難解。
周三深夜上演嘅下線四強賽事就係由克羅地亞對英格蘭，呢隊畀人叫做近年最弱嘅英格蘭排到條好線，竟然入到四強。而克羅地亞都叫「摱車邊」16強同8強用互射12碼晉級。
提提大家喇，兩場波都係有免費電視直播架。神射手方面，暫時排喺射手榜榜首嘅哈利卡尼揸住六球喺手，有望追到佢嘅似乎係得盧卡古暫時入咗四球，家陣一人得返兩場波踢，即管睇下邊個成為最後贏家啦！