基斯坦奴朗拿度（C朗）轉會傳聞繼續吹，早前意大利同西班牙傳媒都報道，指皇家馬德里已經同意以一億歐元（約9.1億港元）轉會費，將呢位葡萄牙球王賣畀意甲班霸祖雲達斯，網上更流傳會喺前日7月7日正式公佈7號C朗加盟。雖然最後咩都冇發生，但前日祖雲達斯嘅官方微博就流出咗段片，似乎係預告C朗會加盟，其後又極速刪post，真係撲朔迷離。
話說有眼利網友發現，祖雲達斯嘅官方微博就放咗段片，Show晒過去曾經着過7號球衣嘅祖記球員名出嚟，包括前意大利國腳迪利維奧、比索圖、沙歷咸美錫、柏比、施蒙尼沙薩，同埋家吓7號嘅擁有人古達度，明顯就係指向緊着7號着到出晒名嘅C朗。不過，呢段片就極速消失咗，但都令一眾祖迷有無限幻想。
佩雷斯唔想做千古罪人
而呢單世紀轉會最初由《都靈體育報》爆出，到其後歐洲各大傳媒都跟進報道，已經鬧得沸沸揚揚，但近兩日又突然冇乜消息咁。據報原來係皇馬方面要「停一停，諗一諗」，全因主席佩雷斯唔想自己遺臭萬年，成為「低價」賣走C朗嘅千古罪人，所以希望對方公開發聲明係自己想走，並唔係因為球會賣佢走。
C朗「講完好話」至交易
C朗09年由曼聯轉會皇馬，九年嚟為球會贏咗兩次西甲同四次歐聯冠軍，功德無量。因此高達一億歐元轉會費，以C朗嚟講都絕對唔算係貴。西班牙《阿斯報》就指，老佛爺唔想自己因為賤賣C朗而成為皇馬嘅千古罪人，影響競逐連任皇馬主席，事關四年前皇馬僅以900萬歐元，將中場大腦沙比阿朗素大平賣畀德甲拜仁慕尼黑，當時老佛爺已經受到唔少指摘。因此今次Hold住轉會，就係希望C朗先公開自己有離隊意欲，令佢同皇馬變成促成好事嘅角色。
不過，據西班牙傳媒報道，C朗本人就希望可以低調咁離開銀河艦隊，唔搞發佈會、更唔搞告別儀式，一切從簡，所以都唔希望公開為轉會發表太多。但係，倘若最終因為表態嘅問題而令轉會告吹，相信都唔係C朗想見到嘅事。嚟緊周三，C朗嘅經理人文迪斯將會同皇方面會面，睇吓雙方有冇辦法達成共識喇。