呢日中午時間，臨時搵到電腦J到上海總會食飯，問吓香港科技創業界有乜新發展，電腦J近年除咗做本行之外，即係電腦系統維修，網絡更新及通訊系統，內聯網運作之外，還會為少許客買電腦及安裝軟件，左丁山十幾年來每次換電腦都係打個電話畀佢，由佢啲同事代購硬件軟件、安裝WiFi嘅。前星期見到屋企部電腦運行慢如蝸牛，問電腦J點解，佢啲夥計一查紀錄，對左丁山講：「喂，你部電腦係七年前買入嘅，out晒嘞，買部新機啦！」
一於照辦，點知呢部D牌電腦送貨慢，又要預先知道家內收貨人嘅姓名及核對身份證號碼，真係煩！收過不少順豐送嚟嘅物件，幾時試過要出示身份證呀？
呢日食飯講起，電腦J話D牌已經唔靠電腦食飯，以前收購EMC，EMC有一間附屬公司叫VMware，賺到笑，實體電腦生意相對而言，重要性已下降。唔怪得FT報導大股東會將D牌重新上市，靠的就是VMware。企業上市後，見股價不振，大股東將之私有化，再收購其他賺錢生意，吼準時機以更高P/E上市，此乃玩財技，並非專心經營某一類生意嘅，小股東買中呢類股票，有幸有不幸啦！
電腦J話現在科技投資最熱門係AI（人工智能），因應用範圍廣泛，可以無處不在，譬如日本農業相當智慧化，已用AI代農民決定播種時間及如何播種。馬雲開無人商店，無AI不行。投資素來無寶不落嘅新加坡淡馬錫已在商湯C輪集資買入商湯股份，李顯龍親自邀請商湯到新加坡與南洋理工大學及新加坡電訊合作研究AI，希望努力追上世界尖端水平。咁世界級研究在那裏呀？電腦J笑曰：「遠在天邊，近在眼前，就在沙田香港中文大學，中大之AI研究水平，在湯曉鷗教授帶領下，已成為世界十大AI研究中心之一，與牛津及卡內基梅隆大學相比，毫不遜色！」哦，原來係咁，唔怪得阿里巴巴與商湯合辦一個AI實驗室，就係設於科學園，聽講此則要多謝羅范淑芬穿針引線，但佢突然冇得做科學園主席，於是不少人猜測有無特殊原因！AI發展固有益人類，但少不免廢除不少工作職位，大把人受到影響。電腦J話牛津大學專家做咗一個關於AI如何代替工人嘅研究，行將在香港發表報告，大家留意可也！