交通規則要遵守，但有笨司機竟然喺阿Sir面前違規「切雙白線」掉頭，究竟係儍吖定一時發雞盲呢？fb交通群組近日流傳一段短片，地點時間不詳，當時一架巿區的士喺一條馬路上行駛，至近一個花叢壆位對開，懷疑司機一時貪方便，唔想走到冇雷公咁遠先可以拐彎，竟越過雙白線掉頭至對線，直接停靠喺路邊，咁啱一名交通警駕駛鐵馬電單車吊住佢尾，唔知司機冇睇後鏡，抑或學咗賭聖個套催眠阿Sir「你睇我唔到，你睇我唔到！」公然喺交通警面前犯規，結果當然走唔過阿Sir法眼，響號示意的士停低抄牌。
目擊司機連講11次「好嘢」
最好笑嘅係，呢一幕「笑片」剛好俾一架對面線客貨車嘅車Cam拍得一清二楚，個司機唔知係咪「睇得好開心」，睇住由司機掉頭，到交通警停車捉人期間，一邊拍晒手掌，笑住連講十一次：「好嘢、好嘢！」仲好高興咁旁述事發經過：「的士越雙白線，阿Sir就跟住佢後面，好嘢！」
段片上咗fb群組，引起成班網民熱議，留低唔少「食花生」評論，有人笑司機自動投案，有網民套用貸款宣傳句揶揄司機：「成功申請（抄牌）， 即時批核。」亦有人直接批評的士司機老眼昏花：「呢啲人，揸車從來唔睇鏡，大地任我行，唯我獨尊報應嘅嘢，唔遲唔早啱啱好。」
根據《道路交通（違例駕駛記分）條例》，司機橫越雙白線可被扣減三分；而按《定額罰款（刑事訴訟）條例》則罰款560元；但根據《道路交通（交通管制）規例》第11條，違反雙白線道路標記規定，首次定罪可被罰款5,000元及監禁3個月，若再被定罪則可罰款1萬元及監禁6個月。