有幾多感情，從不更改到老？有，唔少港人對英國嘅感情，似乎天荒地老，可能因為殖民地時代留落嚟嘅嘢，唔少真係幾美好……喺議會都唔講政治，何況議會外？再講又會有人話「體育不涉政治」喎，都係講返正題先。
前晚英格蘭2：0擊敗瑞典，相隔28年後再次打入世界盃四強，英國人固然好興奮，香港一班英格蘭躉亦相當hyper，身為車路士球迷、甚至做過車仔球迷會法律顧問嘅民建聯副主席張國鈞都有睇直播，佢話英格蘭贏咗固然開心，但就贏得「太順利」嘞，皆因對住嗰隊係瑞典啫，反而凌晨克羅地亞嗰場刺激好多喎。
由細到大捧英國隊，張國鈞話係歷史因素，因為以前免費電視台經常都播英國波，所以對英國隊別有一番感情，好似大家一齊長大咁，同啲球員好似朋友咁，多年嚟都冇變心，之後要畀錢先有得睇英超，佢邊嗌「好貴」但繼續幾多錢都照畀囉。
張國鈞大讚英國波屬「拚命三郎」，普遍唔會揼波鐘，今屆英格蘭隊開局好走線靚，加上其他強隊幾乎出晒局，似乎有望再捧盃喎。