全球矚目嘅世界盃正喺俄羅斯舉行，但球迷關心嘅除咗世盃外其實仲有其他賽事，好似上星期五蘇超格拉斯哥流浪大炒英乙貝利嘅季前熱身賽，就有超過40,000名球迷入場，呢場比賽咁有吸引力，新任領隊謝拉特絕對功不可沒。
六蛋贈貝利戴偉浚有上陣
呢場喺格流主場伊布洛斯進行嘅季前熱身賽，係利物浦兼英格蘭名宿謝拉特領軍嘅第一場比賽，結果吸引咗超過40,000名球迷入場，認真犀利。主場嘅格流亦冇令球迷失望，半場已經領先貝利3:0，最後更以6:0大炒對手，入波嘅球員包括喺七分鐘為球隊先開紀錄嘅占美梅菲，新兵卡迪，同樣新加盟、梅開二度嘅艾菲特同摩尼路斯，仲有埋齋嘅年輕前鋒沙克魯頓，嚟自香港嘅戴偉浚仍然喺貝利一隊，今場亦有披甲上陣。。
謝拉特對球隊表現非常滿意，仲話格流已經為第一場具競爭性嘅比賽做好準備。格流下場比賽，會喺下星期四嘅歐霸盃外圍賽首回合主場對馬其頓球隊FC斯古比，呢場嘅波飛已經賣晒，「謝四」就向球迷保證，到時會睇到一支值得佢哋支持嘅球隊。
謝四表示︰「我哋已經準備就緒，準備好接受挑戰。到時嘅期望同壓力會同今日完全唔同。」佢又話：「係，呢度有40,000人，所以係有啲壓力，特別係第一次被判斷嘅新球員。經過上年之後，當然會有更大壓力同埋有更多關注嘅眼光，但我有信心只要一開賽大家就已經準備好。」
朗尼周六演美職處子戰
至於曾經同謝四一齊征戰世盃嘅朗尼，仍然繼續佢嘅職業球員生涯，好快會喺新環境美職聯亮相。剛由愛華頓轉會華盛頓聯隊嘅朗尼，上周五同新隊友一齊操練，佢會喺周二正式完成轉會手續，預料周六球隊喺新主場Audi Field對溫哥華白帽嘅聯賽，就可以為新東家「地標」上陣。
華盛頓聯隊雖然喺上周三作客以2:2逼和洛杉磯銀河，但佢哋喺今季頭14場只贏過兩場，喺東岸暫時包尾，教練奧臣自然希望朗尼可以成為球隊嘅救世主。