七月一日係星期日，香港人各有各忙，建制派在維園大鑼大鼓慶回歸，泛民發動上街遊行，據講有五萬人參加，警方就話數到唔夠一萬人，得九千幾啫，總之各有各講。左丁山就例牌入馬場，總共有近二萬六千人入場，唔算多，但投注額有15億四千萬多，咁又算係幾唔錯，呢個月有世界盃，不少人小注怡情，足智彩相信投注銀碼爆燈，又因為馬會做莊，碰上連場爆冷，睇怕馬會賺到笑，有大把錢做善事。
正因馬會做得好事多，近幾年每有「馬會力場」之說，令天文台預測時有偏差，總之每次講到有打風、雷暴黃雨諸如此類，一碰上賽馬時間，玉皇大帝就會叫雷公暫時休息，海龍王不要興風作浪。好似七月一日咁，下午曾經落咗一陣大雨，就即刻無以為繼，沙田馬照跑，要等到七月二日補假，天氣先至不穩定，有黃色暴雨，令一家人上山燒烤之半戶外活動，大受影響。
左丁山不參加活動，就在家讀報，睇到蔡子強、Keyman為德國、阿根廷悲傷，寄以無限同情。左丁山好彩睇波冇包袱，輸波唔會喊，以事論事。新亞師弟蔡子強指德國隊跑動多、傳球好、控球比率高，只欠入球，咁咪係囉，西班牙對俄羅斯，控球在腳在75%以上，但無法破網領先（一比零嗰球係俄羅斯擺烏龍）就註定敗走麥城，左丁山講過，德國、西班牙之巴塞式踢法，最怕遇到對方密集加快速突擊，NBA籃球時興small team，以金州勇士為典範，過往巨無霸中鋒如伊榮、奧尼爾、奧拉祖旺等已經近乎絕迹。足球方面，足球強國已捨棄柱躉式中鋒，以美斯、C朗、阿古路、沙拿、簡尼、麥巴比等等技術型前鋒為王，故此德國在分組賽圍攻瑞典（上半場）無效時，下半場還是要出動過氣老齡高大中鋒高美斯在前線衝擊瑞典防綫。西班牙面對俄羅斯的十人泊巴士鐵桶陣，一籌莫展，到了加時才換入高大中鋒洛迪哥，情況有好轉，但為時已晚，結果射十二碼痛失街亭。巴塞戰術曾無敵於天下，皆因那時候各隊還沒想出對策，加上巴塞將星雲集，比一般國家隊強大得多，先至成為地上最強。2018世界盃之後，高大中鋒或會復興成為搶手貨。閱報後，天文台發出黃雨警告大雨傾盤，於是打消出外吃快餐念頭，改在家吃蔡瀾葱油拌麵，自得其樂，好麵即是好麵，輔以奇華經典老婆餅，用多士爐稍焗熱，即軟熟可口，連吃三塊！還有奇華「心晴蝴蝶酥」，DIY慈善曲奇禮盒，盒內原來有便條說明由7月15日至7月20日，顧客每買一盒（60元）奇華便捐贈60元予重病兒童活動及「心晴」困擾人士。吃餅做善事，何樂而不為！