上季宣佈離開祖雲達斯嘅40歲意大利老牌門將保方依然搶手，獲多間大球會爭逐，法甲豪門巴黎聖日耳門（PSG）終喺上周五宣佈，已簽入自由身嘅保方，並已同佢簽下一年死約、一年生約。保方喺PSG將同奇雲查普及艾路拿爭正選。保方話會盡力為PSG贏取錦標：「我了解PSG及球迷嘅夢想，我要用盡所有能量、經驗，協助球會成就偉大目標。」
C朗身價夠保值
另外，外國傳媒近日不斷報道皇家馬德里前鋒基斯坦奴朗拿度（C朗）將以一億歐元轉會費，轉戰意甲並加盟祖雲達斯，如果屬實，C朗嘅身價由2009年以破當時轉會費世界紀錄嘅9,400萬歐元從曼聯加盟皇馬開始計算，九年來只係貶值約600萬歐元，比起歐洲央行消費者物價指數嘅12.5%通脹率，從「銀河艦隊」嘅角度嚟睇，非常保值。