外號Ironman的愛爾蘭籍騎師郭能，剛周五（6日）渡過其40歲生日，佢收咗乜嘢禮物就唔知，但之前就唔見咗幾場頭馬，「加州議長」、「翡翠福星」、「加州再豫」一隻又一隻換人勝出，獎金加加埋埋，你都咪話唔傷。好似最近兩場由郭能跑開、賀賢馬房隻「依斯堅」，就算拼得一次季軍，郭能表現算稱職，但今次（8日）角逐第九場四班1400米，依然換上潘頓，換言之郭能又冇咗一匹實力馬。不過「依斯堅」換潘頓都算正路，眾所周知，馬主低調富豪李耀湘與潘頓是多年老友，由最早期「雪米糍」到「一哥」、「大情人」，雙劍合璧雖然未至於戰無不勝，但一行埋通常都有動作，不時建功。現在潘頓正爭奪冠軍騎師，在在需要實力座騎，質新當起的「依斯堅」正來得合時，只是難為了郭能，失去一場頭馬機會。