皇家馬德里嘅葡萄牙球星基斯坦奴朗拿度（C朗），離隊轉投意甲班霸祖雲達斯嘅消息越傳越似。據講C朗已經同意過檔，甚至連屋都搵埋，盛傳會喺今日正式宣佈轉會。C朗轉會，錢肯定係一大問題，祖記既要畀高達一億歐元轉會費，仲要支付佢高達稅後3,000萬歐元（約2.75億港元）年薪，不過好在幕後仲有其他水喉射住，包括法拉利車廠。
傳今日宣佈轉會
西班牙《阿斯報》指，祖雲達斯最快會喺周六就宣佈33歲嘅C朗加盟，離開佢效力咗九季嘅皇馬。另有傳媒指C朗已經決心要走人，敦促皇馬方面要盡快完成交易。C朗嘅經理人佐治文迪斯，被指係佢一手策劃今次轉會，佢喺周四亦開腔，強烈暗示C朗將會走人：「如果C朗決定離開皇馬，佢將會永遠感激呢間球會、主席、皇馬所有職球員、醫療團隊，以及皇馬嘅每一位成員、球迷同埋全球支持皇馬嘅人。假如佢要轉會，亦會係佢輝煌職業生涯嘅另一新階段同新挑戰。」
轉會未落實，不過據報C朗已經喺意大利都靈搵咗新屋，佢將會入住昔日法國球王施丹，以及前意大利隊長簡拿華路曾經住過嘅居所。施丹喺今夏離任皇馬教練，佢球員時代都曾經喺祖記踢得好成功，唔知有冇機會喺呢度再同C朗合作呢？7號係C朗招牌號碼，祖雲達斯上季7號球衣係屬於哥倫比亞中場古達度，睇嚟下季佢都幾難留得住呢個冧巴，有緊火嘅祖記球迷，已經急不及待去咗印定C朗7號嘅祖記波衫，似乎對呢位葡萄牙球星下季轉戰意甲好有信心。
祖記股價升22%
據報皇馬出售C朗嘅轉會費高達一億歐元（約9.1億港元），年薪亦高達除稅後嘅3,000萬歐元。咁大條數祖記未必孭得起，但有指佢份年薪當中嘅2,000萬，會由法拉利公司支付。另一邊廂祖記自己亦都得益，C朗轉投祖記傳咗幾日，祖記球會嘅股價呢幾日亦好似坐火箭咁，由周一起每股0.67歐元（約6.15港元），到周四繼續有力，收市價升到0.82歐元，升咗超過22%，球會市值增加咗近兩億歐元，所以話純粹以商業角度去睇，雖然C朗已經33歲，但簽佢都依然係物超所值。