喺世盃16強不敵英格蘭出局嘅哥倫比亞，之前一路講到有球迷對球員作死亡恐嚇咁，但大軍禮拜四飛返首都波哥大，就受到國民嘅英雄式歡迎，隊巴一路經過嘅地方都萬人空巷，教練比格文着起隊長法卡奧嘅波衫，好開心咁同球迷揮手，而球迷亦都全部着起哥國嘅黃色戰衣，連負責護送佢地嘅軍隊都一樣，形成一片黃海，唔講真係以為佢哋捧咗盃。哥倫比亞大軍之後喺球場度演講同致詞，球場都迫滿晒人，現場球迷唔少仲帶埋喇叭、號角去助慶，令到球場氣氛相當之好。
另外，哥國互射12碼輸畀英格蘭嘅16強係由美國球證執法，有人就話英美同聲同氣唔公道，有成25萬人聯署同國際足協要求重賽。不過重賽就當然冇咩可能啦，粉絲們惟有寄望球隊喺四年之後可以再創佳績啦。