一班關注南區發展人士、包括退出咗香港眾志嘅袁嘉蔚（Tiffany）早前成立「南區萬事屋」，開始有啲新搞作。日前就喺facebook上載一條名為「黐線佬系列」嘅直播短片，因乜事，黐咗線？原來佢哋組織咗「南區突發執垃圾小隊」，直搗垃圾問題嚴重嘅香港仔黃竹坑明渠，嘗試用之前執返嚟嘅橫額同棍，試吓喺明渠執垃圾。
街坊打氣借法寶
始終都唔係專業，唔少成員執得相當辛苦，有清潔工人見佢哋咁辛苦，借咗個鈎畀佢哋勾垃圾，其間有街坊主動上前了解，仲為佢哋打氣加油。Tiffany喺片中就促請相關政府部門，必須正視香港仔明渠嘅垃圾問題，因為啲垃圾好影響附近生態，垃圾臭味亦好影響附近居民嘅生活環境，希望政府聽完會識做！唔知呢班「黐線佬」，之後又有乜搞作？