近年不時有大專學界嘅學生會被指染紅，好似2012年接任港大學生會會長嘅陳冠康（圖），曾經面臨下台壓力。2013年就有逾千名港大學生喺年初集會，抗議周年大會黑箱作業，又質疑學生會染紅，要求會長陳冠康等人下台，陳冠康則曾發聲明反擊，話校園媒體同本港傳媒中傷同抹黑佢嘅「愛國之心」。
事隔幾年，陳冠康嘅名字再度出現，但今次唔係捲入學界紛爭，而係佢已經搖身一變入咗政府做AO。探子回報，陳冠康已經喺上月28日履新，喺食物及衞生局做助理秘書長（衞生）。據知佢2014年港大畢業後攞過Chevening獎學金，去咗倫敦大學學院（UCL）修讀全球公共政策碩士課程，之後喺不同大型及國際機構工作，如今考入政府做政務官，唔通都係覺得「鐵飯碗」吸引啲？