喺香港擁躉非常多嘅英格蘭，今屆世盃成功打入八強，將會喺周六10點場對瑞典，呢場波仲會喺免費台直播，到時肯定全城瘋狂。國際足協喺周三確定咗今場波嘅執法球證，將會由古比斯吹雞。本來冇乜特別，但原來呢位荷蘭籍球證來頭唔嘢少，可能係世界上最叠水嘅球證，喺老家做連鎖超市老闆，隨時秒秒鐘幾百萬上落。
年收三千萬贊助韋特本
現年45歲嘅古比斯係超市老闆，喺荷蘭經營一間叫Jumbo嘅大型連鎖超級市場，佢嘅身家估計達到1,150萬鎊（約1.1億港元），呢間超市每年可為佢帶嚟近300萬鎊（約3,100萬港元）嘅收入。呢位富豪球證話，其實做球證嘅收入已經足夠佢同家人維持舒適嘅生活。根據英國《鏡報》指，佢嘅公司有錢嘅程度，可以贊助紅牛車隊嘅車手韋特本，呢名車手頭戴嘅黃色頭盔，就印有呢間超市嘅商標。
講番古比斯嘅球證工作，佢曾喺多場大型賽事中執法，例如2013同上季嘅歐霸盃決賽，以及2014年嘅歐聯決賽等，執法經驗豐富。佢亦有喺世盃執法過英格蘭嘅比賽，就係四年前分組賽英格蘭1:2不敵意大利嘅分組賽。呢一場會係佢喺今屆世盃負責執法嘅第四場比賽。根據英國報道指，喺哥倫比亞對英格蘭嘅比賽上，佢私底下對嗰場嘅執法有微言，佢希望世界盃嘅比賽可以更加符合公平競技嘅原則，唔知佢呢個諗法會對英格蘭有好定壞嘅影響。
英軍卡尼冇事或缺華迪
英格蘭方面理得執法球證係富或貧，全力備戰周六大戰。英軍陣中有唔少傷兵，最令人關心當然係目前喺射手榜以六球領先嘅哈利卡尼，佢喺16強對哥倫比亞踢足120分鐘，踢到尾段疑似拉傷。不過球迷可以放心，英格蘭軍醫喺周三同卡尼進行詳細檢查，確定佢冇大礙，聽日可以同球迷見面。另外、迪利阿里、艾舒利楊格、基爾獲加同埋占美華迪都有傷，預計前三者都可以喺八強候命，只有華迪嘅情況比較唔樂觀。而瑞典方面都傳嚟傷情，兩名中場球員艾卡度同占美杜馬斯，都因傷缺席操練，應該都無緣八強戰。