印度航空一架由香港飛去日本大阪嘅客機AI314，噚日朝起飛之後50分鐘，懷疑遇上惡劣天氣令駕駛艙玻璃出現裂痕，急急打道回府降落赤鱲角機場，機場call白車到場戒備，最後機上140幾名乘客全部安全。不過去大阪玩嘅港人心情就好忐忑，唔知要喺機場等幾耐先搭到第二班機。
機場一度局部戒備
返轉頭嘅印航客機係波音787 Dreamliner，噚日原訂朝早8點05分起飛，之後遲咗大約25分鐘先起飛，讀者譚太兩夫婦同埋兩個分別8歲同4歲嘅仔女，開開心心展開6日嘅大阪之旅，食完飛機餐諗住眠一眠就好快到埗啦，機艙都熄晒燈，畀乘客休息。當時飛機已經爬升到逾3萬呎高空，喺距離香港300幾公里同台灣之間嘅海域上空，點知過咗廿分鐘左右，機艙就着燈，機長廣播由於天氣問題航機要折返，空姐空少冇向乘客解釋確實原因。
譚太形容當時「突然間轉彎轉得好勁，去咁多次旅行第一次暈機浪，好拋，想嘔！」佢仲話其實起飛冇幾耐已經見到上空雲層好厚，食飛機餐嗰時都感覺到架機有啲飄，但冇諗到要飛番轉頭咁大件事。根據flightradar24網站紀錄，客機當時突然急轉右彎，兜咗4個圈之後飛返香港機場。消息透露，印航客機機師曾經向機場控制塔講駕駛艙玻璃出現裂痕，所以要緊急折返。機管局證實，噚日朝早10點收到機場控制塔通知，AI314客機需要折返，機場一度局部戒備，客機最終喺10點35分安全降落。
行程被迫縮短，譚太大嘆掃興，佢仲話下次都未必夠膽再坐印航，感覺好危險喎。