仲有唔夠三個月就係十．一中國國慶，十八區區議會當然又會大灑金錢，搞唔同慶祝活動盡顯愛國心。大埔區議會噚日就開會討論慶祝十．一活動嘅撥款申請，其中包括涉款約8萬元嘅社區電影欣賞，主辦機構雖然話係合家歡電影欣賞會，但播放嘅竟然包括IIB級嘅《戰狼2》、《黃金花》同埋《建國大業》。
被指鼓動「雖遠必誅」
獨立民主派劉勇威同八方講，6個民主派議員都表明反對，因為《戰狼2》同《黃金花》都係IIB級電影，當中有暴力鏡頭，唔適合嘅社區中心做公眾播映，建議抽走項目，先討論其他。但區議會內建制派佔多，雖然民主派議員力陳利害，但建制派照樣舉手通過，除咗擔心播放有關電影係主張暴力，劉勇威又認為電影鼓動「雖遠必誅」，同建制派想要嘅國慶主題不合，大嘆建制派只係舉手機器。查實《戰狼2》同《建國大業》都係配合中國大國崛起嘅「愛國電影」，試問建制派又點會唔趁機宣傳愛國思想吖！