自覺「好打得」嘅特首林鄭月娥，揀正7.1上任一周年之時，同有入紙及獲溫馨提示入紙邀約做訪問嘅傳媒見面，講述一年功績，唔知係咪土地房屋方面「交白卷」，情急下將矛頭指向土地供應專責小組，除咗要求小組10月前就土地大辯論提交民意，仲話小組18個選項「濕濕碎碎」，表態大規模填海先有效解決土地荒，據知呢番話惹來唔少小組成員不悅，有人仲話林鄭倒米。
「無中生有顯政績」
地政總署前署長劉勵超噚日都喺《信報》撰文談及「濕碎論」，話呢啲言論出自幹練嘅前政務官兼當今政治舵手之口，「實在令人驚訝和擔憂」。佢話早已講過小組要成18個月工作時間，同政府話解決房屋土地問題「刻不容緩」有落差，唔通政府𠵱家先醒覺要喺10月交成績表？質疑「如今做法是否默認當日的決定反映決策者判斷力不足？」
繼而佢話小組嘅公眾諮詢9月底先完結，有團體已經批評係假諮詢，點知特首仲高調話傾向大規模填海造地，甚至以「濕濕碎碎」形容部份土地選項，劉勵超不諱言填海明明係中至長期措施，如果要談土地選項優次，唔應該先談短中期選項咩？質疑指「也許填海這類『無中生有』的龐大基建工程，才能令政績更突出？」
而特首發表有「預設立場」嘅引導性言論，佢話正中批評政府「做騷」嘅團體下懷，削弱小組獨立性，指小組絞盡腦汁物色土地選項，「特首卻好像滿不在乎其中一些『濕濕碎碎』的選項，目的可能是引導市民聚焦產生最多土地、最有助解決土地荒的填海選項，但更可能產生的效果卻是給專責小組『倒米』，徒令小組尷尬。」
李八方