之前耐唔耐都有客機喺飛行途中，飛機玻璃突然出現裂痕而被迫緊急降落，上年5月一架飛去英國倫敦希斯路機場嘅客機，飛咗3個鐘之後機師發現駕駛艙嘅玻璃出現裂痕，要折返赤鱲角機場降落，當時機上乘客仲包括時任教育局局長嘅吳克儉㖭。香港工程師學會航空分部發言人詹永年話，一般民航機駕駛艙玻璃嘅設計同製造，都已經預咗喺飛行時會受天氣影響或者俾雀鳥撞擊，所以即使玻璃出現裂痕，對航機安全亦未必構成即時危險。
詹永年解釋，通常民航機嘅駕駛艙玻璃都由三層強化玻璃組成，設計同製造方面係符合航行條件，能夠承受某個標準嘅雀鳥或冰雹衝擊，就算飛機駕駛艙玻璃出現裂痕，可能只係表面嗰層破損。不過，航空公司同機師都會根據飛行手冊嘅指引，以及視乎裂痕有否影響飛行視野等等因素，判斷採取甚麼即時行動消除危機。
倘內層完整不影響安全
翻查資料，亦有專家講過駕駛艙外層玻璃係保護中間層玻璃，中間層玻璃可以確保雀鳥或冰雹等外來物衝擊，而內層玻璃可以承受客艙壓力，只要內層玻璃維持完整，應未至於影響飛行安全。