民主黨立法會議員尹兆堅噚日朝早出席工務小組發言時，一開聲即時嚇親唔少人，更令在席嘅民政事務局局長劉江華忍唔住笑咗，點解呢？
原來阿尹因為連日喺立法會同電台激辯土地問題，搞到失咗聲，噚日連發言都相當困難，要叫大家忍讓一下。
上次失聲因謝偉俊
阿尹仲自爆過去試過好多次失聲，大部份都發生喺佢激動發言之後，上次失聲就係因為建制派自閹《議事規則》，令佢忍唔到狂鬧議規會主席謝偉俊。
雖然阿尹聲都失埋，但無減佢喺立法會嘅戰鬥力，佢除咗朝早喺工務小組發言反對有「小白象工程」之稱嘅觀塘噴泉撥款。
其後又喺立法會大會就迪士尼用地提出口頭質詢，自稱至今仲頂得住，係因為食咗成盒念慈菴喉糖，再飲咗三啖念慈菴喎。