這日遇到工業總會主席郭振華先生，一時醒唔起佢嘅本業係乜，於是厚面皮問多一次，郭主席話：「我做化工嘅，冇上市。」唔上市有好處嘅，悶聲發大財無人知，又唔駛花太多錢做合規及工作，身為董事長會精神愉快好多。當然，上市後如股價高達利潤三四十倍（即P/E去到30-40倍），董事會主席身家一定厚好多，付出更大精神魄力，忍受更大壓力都冇所謂啦。
經郭主席一提，記得番郭主席係台灣「國立成功大學」畢業生，主修化學，現在係永保化工（香港）有限公司董事總經理，正是學嗰樣，做嗰樣，一生興趣所在。永保化工有英文名字，就是Rambo Chemicals，與香港中文大學校長段崇智之英文名Rocky好對稱，大明星史泰龍有兩個系列電影極其賣座，首先係Rocky，跟住係Rambo，有機會要搵埋Rocky校長與Rambo嘅老闆一齊食餐飯先。
與郭主席講及香港科技創業有乜樽頸，主席話，「香港有人才，科研都幾叻，投資基金不缺，法律制度完備，照計一切都好好，只是因為合規關係，我知道一啲SME（中小企）因為生意比較細，銀行唔鍾意，要佢地閂戶口。對SME影響甚大，有歷史之中小企已經如此，年輕人搞初創公司要開銀行戶口，更加困難，希望政府鼓吹創業之餘：要考慮呢一點。其次，初創公司接到第一批訂單之後，要搵工廠製造新產品，往往上深圳東莞搵，如果唔小心，或者會畀一啲不良工廠欺負，以至欺騙，要慎防遇人不淑。工業總會有見及此，正在搞緊Matching工作，希望工業總會會員廠商能夠與初創企業合作齊齊上，如果合作經驗愉快，講唔定我地啲廠商會提供埋投資資金及支援合作對象㗎！」郭主席果然睇得通透，初創企業有不少風險要克服，最初第一次風險就是接到訂單之後，搵內地工廠製造，一個唔好彩香港廠商與初創公司之收到次貨，最後買家一定詐型，咁就前功盡毀，初創企業選擇內地製造商，不可不小心翼翼也。香港工業總會如能與科學園、數碼港合作，提供配對安排，會係一件大好事。寫到呢度，電腦J通知羅兵咸永道（PwC）之第二屆HackaDay比賽已經舉行，中文大學學生隊連續第二年奪得冠軍，第二名係城大，第三名係理大，中大隊由兩名電腦系、兩名數學系學生組成。係唔係中大學生產生精英黑客呢？