喺世盃16強大爆發、助法國擊敗阿根廷晉級嘅基利安麥巴比，人氣越嚟越勁，仲被譽為美斯同基斯坦奴朗拿度嘅球王接班人。似乎皇家馬德里都知道家陣只係19歲嘅麥巴比，前途無可限量，甚至係當今球壇最強潛力股，其喉舌報《阿斯報》即透過社交網頁放風，話巴黎聖日耳門（PSG）已經接受皇馬開出破世界紀錄轉會費2.4億鎊（約25億港元）嘅斟介，同意將麥巴比出售，不過報道好快又被刪除，皇馬方面亦立即否認咗。
皇馬早前亦否認斟介尼馬，家陣又否認簽埋麥巴比，但空穴來風未必無因，皆因近日係咁傳當家球星基斯坦奴朗拿度（C朗）會被出售去意甲祖雲達斯，所以放定風話想羅致麥巴比為未來鋪路，都唔係冇道理，亦可以探吓PSG方面嘅意向。不過，PSG去年夏天先用先借後買形式由摩納哥簽麥巴比，所以要佢哋放人除非個價錢真係好吸引，亦可以好肯定一定會破尼馬去年以二億鎊加盟嘅紀錄。
經理人文迪斯搞鬼
至於C朗一億歐元（約9.1億港元）過檔祖記嘅傳聞，最新消息係西班牙權威電視台六台一個叫《Jugones》嘅節目，有記者宣稱皇馬已經答應畀C朗離隊，其中一個原因係雙方遲遲都未達成續約共識，又考慮到佢都33歲，所以唔排除喺今個夏天收番一筆仲好，而意大利嗰邊報道就話，主要係佢個經理人文迪斯搞鬼，皆因早前成功同祖記傾掂旗下葡萄牙右閘祖奧簡斯路嘅交易後，就呼籲祖記去斟C朗，話有信心幫佢哋搞掂埋呢單天價交易。
另外，傳C朗知道祖記想簽佢，都唔介意去意甲接受新挑戰，最重要係老婦人肯提供一份稅後年薪3,000萬歐元嘅合約，呢份合約同皇馬提出嘅新合約待遇一樣，而且因為意大利稅收甚至高過西班牙，代表祖記可能要畀出6,000萬歐元都制，誠意十足。至於祖記方面要衡量嘅，當然就係買入都成33歲嘅C朗後，到底有冇得賺，但據聞佢哋計過條數，喺C朗身上得到嘅商業回報，遠大過一億歐元轉會費同要畀C朗嘅昂貴年薪。