人多嘅地方往往係扒手搵食嘅地方，有網民喺fb po相話有扒手喺尖沙嘴港鐵站扒正差人，俾對方當場制服反手撳落地，聽落合情合理。當網友都熱烈討論，取笑個賊有眼不識泰山好鬼蠢嘅時候，小記依然秉持求真嘅原則，當然係問警方啦！結果，同網民嘅消息有啲出入，偷就係偷嘞，但唔係偷阿Sir嘢，係喺舖頭偷手機，俾阿Sir喺港鐵站周到箒。
網民周小姐前晚9點幾喺尖沙嘴站見到阿Sir捉賊呢一幕就影低佢擺上fb，相中一個男人俾個着黑衫嘅四眼仔反手撳喺地下，冇得反抗。周小姐寫住「尖沙嘴突發，有賊仔喺地鐵站偷嘢，被偷的人正正就係便衣阿sir，最後賊仔被當場制服。」唔少網友留言笑個賊好蠢，自投羅網。
為咗了解真相，小記就問吓警方件事係唔係網民所講咁啦。警方發言人證實，前晚接近8點，金馬倫道一間兼賣手機嘅電器舖俾賊人偷走咗一部手機，警方接報之後，軍裝同便衣警分別在附近兜截，追查賊人下落，結果相中着黑衫嘅便衣警喺尖沙嘴港鐵站入面截到疑犯，即場制服拉咗佢。