立法會主席梁君彥上星期四提早休會，被質疑是為避過在今年度討論有關主席嘅不信任動議，不過民主派點會咁易放過佢。據了解，民主派對於今年度成功提不信任動議仍未死心，一方面去信內會，要求批准一次會議討論三項議員議案，令最後一次大會可以討論埋不信任動議，另一方面要求調動議程，務求盡快「審議」梁君彥，不過要調動議程，就先要問過梁君彥黨友、經民聯嘅梁美芬！
務求盡快傾不信任動議
點解梁美芬可以有權左右大局？咁八方要由梁君彥上星期提早完會講起。由於梁君彥提早完會，結果令最後兩次大會處理嘅議員議案全部向後退，原本排喺最後一次會，由專業議政李國麟動議嘅「對立法會主席投不信任票」議案就擠出局，冇得喺最後一次會審議。不過泛民依然有辦法對付黑哨梁君彥。據知佢哋醞釀將由陳志全提出、下周即將審議嘅「研究制訂讓同志締結伴侶關係」議案，同李國麟動議嘅議案次序互換，咁就可以趕得切討論係由會前傾，唔會俾梁君彥得逞。
不過呢個方法仲有一個隱憂，就係建制派嘅梁美芬就陳志全議案提出修正案，要調位要先得梁美芬同意，唔知梁美芬會唔會為咗保住主席梁君彥而唔肯喇。
由於調位呢招得唔得仲未知，所以民主黨主席胡志偉已去信立會內務委員會，要求梁君彥改變現時一次會議只處理兩項議員議案嘅做法，改為處理三項議案，變相亦可以令梁君彥不信任動議可於休會前辯論，但喺建制派佔多數嘅議會，似乎都唔太可以，胡志偉話呢個方法都係「盡力一試」。
李八方