經民聯立法會議員梁美芬，噚日下晝突然同兩名男黨友，包括「肥老闆」張華峰同黨主席盧偉國喺走廊表演「推車」，話要請記者食成10元一粒嘅提子。鼠王芬話，早前大台有套講果欄嘅電視劇，「我煲晒啊！因為我細個係喺果欄附近長大，我阿爺同埋我阿公都係喺嗰度開舖頭，做鐵嘅生意」，自爆套劇大結局後第二日，佢即刻去咗油麻地果欄掃咗大批水果，目的係想推動大家支持果欄行業，呢日就買生果畀記者食。
鼠王芬介紹生果時，多次強調佢買嘅日本香印提子要成10蚊粒，話成車水果用咗佢2,000幾蚊！盧偉國聽到，就話粒提子點貴重「都唔及得美芬心意咁貴重……」仲突然對住鼠王芬唱出「情與義……值千金，係咪啊？」鼠王芬聽完就話，經民聯有盧偉國，好似「愛登士家庭」喎。