作為港爸港媽，最關心一定係香港的教育，問題數之不盡，相信大家一定清楚過青冰，身邊的朋友，負擔得起的，很多都轉投國際學校陣營，相對上少一點催逼云云；作為投資者，一定知道今年最強板塊，教育股肯定是其一，不過在港上市的熱炒教育股，幾乎全部的業務都是在內地。
早幾個月傳出，二線內房股萊蒙（3688）會收購本港啟思幼稚園，幾名高層已經加入了董事局，按早兩日《蘋果日報》報道，交易接近完成了，紅色資本入侵幼兒教育，自然引來很大迴響，但在商業社會，你都冇佢計嘅，朋友話，呢個肯肯定係阿爺意旨啦，如果係真的話，咁萊蒙肯定有前途了，為阿爺開路，打進幼兒市場，不過前途歸前途，你睇下個股價圖已經唔開胃，跌幅冠絕內房股，所以這個業務短期內未必幫得到公司。
現時行內市值最大的中教（839），算係教育股中的龍頭，雖然近日跟大市急回，但今年仍然累升近一倍，青冰在上月有在fb提過戰友，公司上市夠半年了，提防因為升得多，基石股東食糊走人，不過近期市況咁曳，想配股應該也找不到人接吧，加上今星期出咗個通告，都值得留意。佢哋宣佈同惠理（806）成立一個中國教育基金，各出資幾億，目標就係籌到50億元，用來投資國內民辦高等及職業教育，呢個都算係VP的新嘗試，拍住一個行內人，揀學校投資應該更有着數，咁就好過上市前先做基石投資者，會賺少好多啊。
VP本身都係中教上市時的基石投資者，半年過後，本來都怕佢會沽貨，不過今次的合作，曲線否定了這個可能性，大家傾完合作轉頭你就去沽我，似乎講唔通吧，教育基金會運作5至7年，或許會長期持有，自6月中禁售期完結後，中教都未試過有大手貨上板，又由於幾位基石股東，都係持有5%以下，所以有理由相信，即使佢哋食糊，都係酌量吃，如果你信這個概念未完，又信VP，中教應是不錯的選擇。
青冰
http://fb.com/chingbing888
本欄逢周四刊出