上周六有巿民喺金山郊野公園見到野豬同馬騮爭食，事隔幾日，又有巿民偶遇野豬，不過今次就唔見齊天大聖嘞。其實喺香港經常都有野豬出沒，佢哋蒲頭都係搵啖食箒，如果冇攻擊性，又騷擾唔到民居嘅話，唔使下下報警同埋call漁護署嘅。
好似讀者阿輝咁，前日下晝1點左右佢揸車經過西貢，人有三急於是駛入孟公屋下村搵公廁，就畀佢遇到一隻野豬媽媽，一拖三帶住三隻野豬仔喺草叢、垃圾桶一帶搵食。
當途人透明
野豬一家四口一於你有你去廁所，我有我哋去搵食，完全當阿輝透明。阿輝由得佢哋行過，相安無事。
野豬係雜食性動物，最叻用個鼻翻土，掘啲根莖植物或者泥土入面嘅小昆蟲嚟醫肚，漁護署經常呼籲巿民唔好餵飼野生動物，阿輝都冇手多多餵嘢畀佢哋食，都啱嘅，事關如果你餵啲嘢食吸引野豬，佢哋就會食過翻尋味，成日返嚟搵嘢食㗎喇。小記提提大家，萬一真係受到野豬滋擾，或者發現野豬受傷、被困、誤闖市區，1823都係要打嘅。