阿婆，你俾10幾個阿sir拉返差館，仲要抬你上埋車，你知唔知你究竟衰乜嚴重罪行？你唔知，你仲喊喎，我𠵱家講你知。
第一，你衰喺錯誤時間擺檔。你做乜喺人哋阿sir同食環搞大龍鳳聯合行動嘅時候仲擺檔呢？話明大龍鳳梗係做戲做全套無情講啦。你應該揀喺林鄭選特首，或者是但一個人想選特首，選立法會都可能得，區議會就唔好啦，無乜人報導。如果你揀喺林鄭選特首嗰陣出嚟擺檔，你咪唔會俾阿sir圍囉，你會得到林鄭特首親切嘅慰問同埋慷慨嘅500蚊紙，同時絕對唔會有阿sir夠膽話你「非法行乞」或者「非法擺賣」。你得到的便是同情而不是「一致的執法」。鏡頭捕捉之下，話唔定仲有社署人員會關心跟進你的生活情況，而唔似𠵱家咁樣，淨係想捉你上車。阿婆，你揀錯時間啦。
第二，阿婆你衰在淨係識得喊而唔識講英文。你試吓好似嗰時嗰個法官姪女咁，大大巴摑落阿sir塊面度，再加一句英文，個阿sir邊敢出聲警告佢「你唔好打阿sir啊」。但阿sir夠膽凶你！阿sir捉你上車時會大聲話「阿婆你隻腳唔好踢到我﹗」真係聽到都好笑﹗堂堂男子漢怕俾阿婆嘅香雞腳踢傷。阿婆莫非係峨嵋派掌門？難怪熱心市民都忍唔住「你唔係想告阿婆襲警啩？」
唔識英文，阿婆你真係蝕底。
第三，阿婆你做乜要為咗照顧百歲媽媽而冒險出嚟擺街檔先得㗎。你本身已經係長者仲要照顧另一個長者，咁擺明落林鄭面啫。林鄭今年新春時講過，話「狗係好忠心耿耿，亦都好照顧主人家嘅，我哋特區政府都係好照顧老人家嘅」。林鄭話政府會好似隻狗咁照顧你哋老人家，𠵱家你明啦，就係要你哋老人家做到隻狗咁照顧其他老人家啊。
各位阿sir，圍阿婆，嚴正執法，你哋真係無做錯！