面對瘋狂上升嘅樓市，政府又出招，其中主要為居屋與私樓市價脫鈎，將9塊私樓地皮改劃為興建居屋，加大居屋建屋量。特區政府現班子係上任一周年前夕急急出招，究竟能唔能夠壓低高企嘅樓價，其實可能佢哋自己都無咩信心。
居屋與私樓市價脫鈎，改為用供樓負擔定價，居屋變相大減價；再加上政府計劃將市區靚地改劃為居屋，係呢兩個特大誘因之下，可以預期嚟緊抽居屋人數將會創新高。居屋定價同市民入息掛鈎，未來無論一手居屋定二手未補地價居屋價格將會封頂，之前拎住間陳舊未補價公屋居屋吊高嚟賣，叫天價嘅情況將會絕迹。呢項措施嘅唯一輸家就係之前天價接貨嘅未補價二手公屋居屋買家，係可見將來應該唔會再見到家鄉。
雖然政府看似畀咗無殼蝸牛希望，但政府未有保證長遠有足夠資助房屋畀市民買。喺每年得幾千個居屋單位應市下，抽中而買到同中六合彩分別不大。政府將本來起私樓嘅地，改為起居屋，私樓長遠供應量只會下跌，現在已經天咁高嘅私樓樓價只會更難落番嚟。政府玩分餅仔遊戲，個餅無大到，房屋問題又點可以解決？
政府無從問題根源出發去解決香港房屋問題，佢只係提高抽獎嘅中獎金額，不過中獎人數無相應大幅增加。越多人被吸引玩呢個抽獎遊戲，每人中嘅難度就越嚟越高。急需置業成家立室嘅香港人有幾多個年頭可以等中獎？
Melody
http://fb.com/whichroad