紅底商人政協常委早前為力谷大灣區，發表「我們將來唔係香港人，係大灣區人」偉論後，粵港澳大灣區青年共同家園籌備委員會同香港匯演藝能中心亦歸隊，喺大灣區規劃盛傳七月出台前，搶閘plug歌造勢。
呢首名為《共同家園》嘅「粵港澳大灣區主題曲」，主唱嘅多達26位歌手，包括譚詠麟、李克勤、王祖藍等，過去曾幫過前特首煲呔曾一齊rap聖誕歌、但話過唔知特首曾蔭權係一個人，抑或係一個職位而成為政圈笑料嘅MC Jin歐陽靖都有現身，rap嘅內容包括：「歡迎嚟到大灣區，美好嘅將來同理想一齊去追」、「有啲嘢唔使講大家心照，大灣區簡直同一個心跳」。唔知大家聽完，又係咪真係心照，會同呢班「大灣區人」同一心跳？八方只知喺約3分半鐘嘅MV，無綫高層樂易玲都出現過幾秒，片尾「特別鳴謝」佢同曾志偉。